Premi 2013

Set nominaziuns – trais premis

A la surdada dals premis dals 13 da zercladur en la Chasa dals chantuns a Berna ha la giuria naziunala attribuì l’emprim premi per la promoziun da la sanadad a la citad da Yverdon-les-Bains e dus segunds premis a las vischnancas da Horgen e Wangen-Brüttisellen. Las quatter giurias d’experts regiunalas avevan nominà ordavant set projects da vischnancas e da citads per il premi “Vischnanca sauna resp. Citad sauna.

La coordinatura da la cumissiun dals incumbensads chantunals per la promoziun da la sanadad da la Svizra latina, Alexia Fournier Fall, ha pudì surdar l’emprim premi a la delegaziun da la citad da Yverdon-les-Bains per la “Politica da sanadad” cumplessiva da la citad. Dapi set onns sa concentrescha la promoziun da la sanadad da Yverdon sin mesiras per meglierar las cundiziuns da viver relevantas per la sanadad. Tenor il princip da la “sanadad communitara” contempleschan commembers d’ina communitad – p.ex. d’in quartier – ensemen lur qualitad da viver, expriman lur giavischs e gidan a realisar mesiras che correspundan il meglier a lur basegns.
Renate Amstutz, directura da l’Uniun da las citads svizras, ha surdà il segund premi als represchentants da la vischnanca da Horgen per la politica persvadenta en favur dals uffants e da la giuventetgna. Horgen metta l’accent sin ils facturs che promovan la sanadad e tegna en egl l’entir spazi social, en il qual ils uffants e la giuventetgna sa movan.
La vischnanca da Wangen-Brüttisellen ha medemamain survegnì in segund premi. Maria Luisa Zürcher, directura suppleanta da l’Associaziun da las vischnancas svizras, ha undrà il concept exemplaric per la promoziun da la sanadad. Il concept mussa co ch’ins po cun agir instituziunalisà enconuscher il pli spert pussaivel tenutas e relaziuns malsaunas al domicil e prender tenor basegn las mesiras necessarias.


Distincziun da bunas praticas sin plaun communal

Cun la nominaziun e la premiaziun dals13 da zercladur èn vegnidas undradas per l’emprima giada en Svizra exempels exemplarics da la promoziun da la sanadad communala. Cusseglier naziunal Ignazio Cassis, president da la Fundaziun svizra per la promoziun da la sanadad RADIX, ha accentuà l’impurtanza da la vischnanca sco ambient da vita. Ella creeschi las premissas per bunas cundiziuns da viver en il mintgadi. Las citads e las vischnancas sajan damai acturas impurtantas per la promoziun da la sanadad e la prevenziun.

20 vischnancas e citads eran sa participadas a l’emprima concurrenza. Las quatter giurias regiunalas han nominà las citads da Lugano, Yverdon-les-Bains ed Aarau sco era las vischnancas da Stans, Risch/Meierskappel, Horgen e Wangen-Brüttisellen. L’elecziun da las nominaziuns e dals projects victurs n’è betg stada simpla perquai che la qualitad dals projects inoltrads ha surpassà las spetgas. Il premi vegn sustegnì da l’Uffizi federal da sanadad publica, da la Conferenza svizra da las directuras e dals directurs chantunals da la sanadad, da la Promoziun Sanadad Svizra, da l’Associaziun  da las vischnancas svizras, da l’Uniun da las citads svizras e da la Fundaziun svizra per la promoziun da la sanadad RADIX. Infurmaziuns davart ils programs premiads: www.vischnanca-sauna.ch.

Ulteriuras infurmaziuns chattais Vus per tudestg u franzos.